काठमाडौं, ९ साउन । नेपाल कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले देशको राष्ट्रिय स्वाधीनतामाथि संकट आएको बताएका छन् ।
नरबहादुर कर्माचार्यको १३औँ स्मृति दिवसका अवसरमा पार्टी केन्द्रीय कार्यालय पेरिसडाँडामा आयोजित कार्यक्रममा उनले कम्युनिस्ट आन्दोलन कमजोर बनेको उल्लेख गर्दै त्यसलाई पुनः एकताबद्ध र सशक्त बनाउनुपर्ने आवश्यकता औँल्याए ।
प्रचण्डले राष्ट्रिय स्वाधीनताको रक्षा, कम्युनिस्ट आन्दोलनको पुनर्जीवन तथा देशको नेतृत्व गर्ने संकल्पका साथ अघि बढ्नुपर्ने बताए ।
उनले मुलुकमा निरंकुश प्रवृत्ति देखापरेको दाबी गर्दै त्यसविरुद्ध फेरि संघर्ष गर्नुपर्ने अवस्था आएको समेत उल्लेख गरे ।
