जनकपुर, ९ साउन । प्रधानमन्त्री बालेन्द्र शाह ‘बालेन’ले मुलुकको अर्थतन्त्रलाई चलायमान बनाउने उद्देश्यले निजी क्षेत्रका उद्योगी–व्यवसायी तथा विभिन्न क्षेत्रका सरोकारवालासँग संवादलाई तीव्रता दिइरहेका बेला मधेशका दलित समुदायका प्रतिनिधिसँग पनि छुट्टै संवाद गर्नुपर्ने माग उठेको छ ।
राष्ट्रिय दलित पत्रकार संघ, नेपाल धनुषाका अध्यक्ष कुलदिप दासले प्रधानमन्त्रीले मधेश प्रदेशका दलित अगुवा, अधिकारकर्मी तथा सरोकारवालासँग प्रत्यक्ष छलफल गरी समुदायका समस्या, चुनौती र समाधानका उपायबारे गम्भीर रूपमा छलफल गर्नुपर्ने बताएका छन् ।
उनले मधेशमा अझै पनि दलित समुदायमाथि विभेद, सामाजिक बहिष्करण, शिक्षा, स्वास्थ्य, रोजगारी, भूमिहीनता तथा न्यायमा पहुँचलगायतका विभिन्न समस्या विद्यमान रहेको उल्लेख गर्दै यस्ता विषयलाई राज्यको उच्च प्राथमिकतामा राख्न आवश्यक रहेको बताए ।
दासले सरकार निजी क्षेत्रसँगको संवादलाई जस्तै सामाजिक न्याय र समावेशिताका मुद्दामा पनि निरन्तर संवाद अघि बढाउनुपर्ने धारणा राखे ।
उनले दलित समुदायका वास्तविक समस्या बुझ्न सम्बन्धित क्षेत्रका अगुवा, नागरिक समाज, पत्रकार तथा सरोकारवालासँग प्रधानमन्त्री स्वयंले छलफल गरे त्यसबाट प्रभावकारी नीतिगत निर्णय लिन सहज हुने विश्वास व्यक्त गरे ।
उनका अनुसार समावेशी विकास र सामाजिक न्याय सुनिश्चित गर्न सबै समुदायको आवाज सरकारसम्म पुग्न आवश्यक छ । त्यसका लागि मधेशका दलित समुदायसँग प्रत्यक्ष संवादको वातावरण सिर्जना गर्न सरकारसँग उनले आग्रह गरेका छन् ।
