काठमाडौं, ९ साउन । देशभर मनसुनी वायुको प्रभाव कायम रहेकाले आज शनिबार पनि अधिकांश प्रदेशमा वर्षाको सम्भावना रहेको मौसम पूर्वानुमान महाशाखाले जनाएको छ ।
महाशाखाका अनुसार दिउँसो र राति पहाडी तथा हिमाली भूभागका केही स्थान र तराईका विभिन्न क्षेत्रमा मेघगर्जन, चट्याङसहित मध्यम वर्षा हुने सम्भावना छ ।
बागमती, गण्डकी, लुम्बिनी, कर्णाली तथा कोसी प्रदेशका पहाडी क्षेत्रमा केही स्थानमा भारी वर्षासमेत हुन सक्ने भएकाले सतर्कता अपनाउन आग्रह गरिएको छ ।
काठमाडौं उपत्यकामा पनि दिउँसोपछि बादल बढ्दै अपराह्नदेखि साँझसम्म हल्कादेखि मध्यम वर्षा हुने सम्भावना रहेको मौसमविद्ले बताएका छन् ।
