काठमाडौं, ८ साउन । वैदेशिक रोजगार विभागले ५ सय ९८ म्यानपावर कम्पनीमाथि कारबाही गरेपछि व्यवसायी आन्दोलनमा उत्रिने चेतावनी दिएका छन् ।
नेपाल वैदेशिक रोजगार व्यवसायी संघले १५ दिनभित्र सरकारले कारबाही फिर्ता लिई आफ्ना १५ बुँदे माग सम्बोधन नगरे १६औँ दिनदेखि वैदेशिक रोजगारीका लागि श्रमिक पठाउने सम्पूर्ण प्रक्रिया बन्द गर्ने घोषणा गरेको छ ।
व्यवसायीहरूले भारतीय विमानस्थल प्रयोग गरेकै आधारमा गरिएको कारबाही अन्यायपूर्ण भएको दाबी गर्दै विभागले आफूहरूलाई अपराधीकरण गर्न खोजेको आरोप लगाएका छन् ।
उनीहरूले कारबाही फिर्ता, वैज्ञानिक सेवा शुल्क निर्धारण, हवाई टिकटमा लगाइएको १३ प्रतिशत भ्याट हटाउन तथा साउदी अरबमा लागू एसभीपीलगायतका व्यवस्था हटाउन माग गरेका छन् ।
यता वैदेशिक रोजगार विभागले भने कारबाही वैदेशिक रोजगार ऐनअनुसार गरिएको स्पष्ट पारेको छ । विभागकी महानिर्देशक मिरा आचार्यले कानुनभन्दा माथि कुनै सहमति वा समझदारी नहुने बताउँदै कानुन कार्यान्वयनमा कुनै सम्झौता नहुने स्पष्ट पारिन्।
साथै, प्राविधिक त्रुटि देखिएमा आवश्यक सच्याइ गरिने उनले बताइन् ।
