काठमाडौं, ८ साउन । चितवनको इच्छाकामना गाउँपालिकाका ३४ भूमिहीन दलित, सुकुमवासी तथा अव्यवस्थित बसोबासी परिवारलाई जग्गाधनी दर्ता प्रमाणपत्र (लालपुर्जा) वितरण गरिएको छ।
जिल्ला भूमि समस्या समाधान समिति, चितवनले लालपुर्जा हस्तान्तरण गरेसँगै ती परिवार कानुनी रूपमा जग्गाधनी बनेका छन्। लामो समयदेखि जग्गाको स्वामित्वबाट वञ्चित स्थानीयले अब आफ्नै नाममा जग्गाको अधिकार प्राप्त गरेका छन्।
यस्तै, झापाको कनकाई नगरपालिकामा पनि पाँच भूमिहीन दलित तथा अव्यवस्थित बसोबासी परिवारलाई लालपुर्जा वितरण गरिएको छ।
सरकारले भूमिहीन दलित, सुकुमवासी तथा अव्यवस्थित बसोबासीलाई कानुनी रूपमा जग्गाको स्वामित्व दिलाउने अभियानलाई देशभर निरन्तर अगाडि बढाइरहेको जनाएको छ।
