रौतहट, ९ साउन । रौतहटको गुजरा नगरपालिका–५ हरिहरपुरमा शुक्रबार बिहान खुकुरी प्रहारबाट एक महिलाको ज्यान गएको छ।
प्रहरीका अनुसार बिहान करिब १०:३० बजे स्थानीय रेनु देवी जयसवाल (अन्दाजी ४०–४५ वर्ष) माथि धारिलो हतियार प्रहार भएको थियो। गम्भीर घाइते भएकी उनको घटनास्थलमै मृत्यु भएको प्रहरीले जनाएको छ।
घटनामा बाराको करैयामाई गाउँपालिका–८ ईटहर बेलाहीका स्थायी बासिन्दा तथा हाल हरिहरपुरमा बसोबास गर्दै आएका उपेन्द्र साह कलवार (अन्दाजी ३५ वर्ष) संलग्न रहेको आशंकामा प्रहरीले अनुसन्धान गरिरहेको छ।
घटनापछि आक्रोशित स्थानीयवासीले उपेन्द्रमाथि कुटपिट गरेका थिए। गम्भीर घाइते भएका उनको चन्द्रनिगाहपुरस्थित चन्द्रपुर अस्पतालमा उपचार भइरहेको छ।
प्रहरीका अनुसार घटनाको कारण खुल्न बाँकी रहेको छ। घटनाबारे थप अनुसन्धान अघि बढाइएको प्रहरीले जनाएको छ।
