जनकपुर, ७ साउन । मधेश प्रदेश सरकारको ‘बेटी पढाऊ, बेटी बचाऊ’ कार्यक्रमअन्तर्गत खरिद गरिएका ४५ सयभन्दा बढी साइकल वर्षौंदेखि गोदाममै थन्किएर कवाड बन्दै गइरहेको विषयमा सम्बन्धित मन्त्रालयका मन्त्री नै अनभिज्ञ देखिएका छन् ।
शिक्षा तथा संस्कृति मन्त्री मनोज कुमार सिंहले यस विषयमा आफूलाई हालसम्म विस्तृत जानकारी नरहेको स्वीकार गर्दै वास्तविक अवस्था बुझ्ने प्रयास भइरहेको प्रतिक्रिया दिएका छन् ।
यसअघि मुख्यमन्त्री तथा मन्त्रिपरिषद्को कार्यालयका सूचना अधिकारी रोहित कुमार कोइरालाले साइकलसम्बन्धी सम्पूर्ण कागजात शिक्षा तथा संस्कृति मन्त्रालयमा हस्तान्तरण गरिसकिएको बताएका थिए ।
तर सम्बन्धित मन्त्रालयको नेतृत्व गरिरहेका मन्त्रीले नै हजारौँ साइकल गोदाममा थन्किएको विषयमा जानकारी नभएको बताउनु मन्त्रीको कार्यशैली, मन्त्रालयको अभिलेख व्यवस्थापन, अनुगमन प्रणाली र सरकारी जवाफदेहितामाथि गम्भीर प्रश्न उठाउने विषय बनेको छ ।
सम्बन्धित मन्त्रालयकै जिम्मेवार नेतृत्व यस्तो विषयमा अनभिज्ञ देखिनुले कार्यक्रमको प्रभावकारी कार्यान्वयनमाथि समेत प्रश्न उठेको छ ।
