काठमाडौं, ७ साउन । अख्तियार दुरुपयोग अनुसन्धान आयोगले मधेस प्रदेशका पूर्वअर्थमन्त्री शैलेन्द्रप्रसाद साह सहित ७ जनाविरुद्ध भ्रष्टाचार मुद्दा दायर गरेको छ।
सर्लाहीको बागमती नगरपालिकाको फनपार्क एण्ड रिसोर्ट निर्माण आयोजना सम्बन्धी ठेक्का प्रक्रियामा अनियमितता गरेको आरोपमा विशेष अदालतमा मुद्दा दायर गरिएको हो।
मुद्दामा पूर्वअर्थसचिव, बागमती नगरपालिकाका मेयर, उपमेयर, तत्कालीन प्रमुख प्रशासकीय अधिकृत, प्रदेश अर्थ मन्त्रालयका तत्कालीन उपसचिव तथा निर्माण कम्पनी र त्यसका प्रतिनिधिलाई पनि प्रतिवादी बनाइएको छ।
अख्तियारले पूर्वमन्त्री र पूर्वसचिवसँग ३५/३५ करोड रुपैयाँ, मेयर, उपमेयर, प्रमुख प्रशासकीय अधिकृत र निर्माण कम्पनीसँग ३९ करोड ३९ लाख ६६ हजार ३३३ रुपैयाँ तथा उपसचिवसँग २० करोड रुपैयाँ बिगो दाबी गरेको छ।
आयोजनाको ठेक्का लागत अनुमानभन्दा २४.५ प्रतिशत कममा सम्झौता गरिएको विषयलाई अख्तियारले अनुसन्धानको आधार बनाएको जनाएको छ।
