जनकपुर, ५ साउन । धनुषाको बटेश्वर गाउँपालिका–५ निवासी २२ वर्षिय अमृता कुमारीको जनकपुरस्थित प्रादेशिक अस्पतालमा पथरीको शल्यक्रियापछि मृत्यु भएको घटनाले गम्भीर प्रश्न उठाएको छ ।
मृतकका परिवारले शल्यक्रियापछि चिकित्सक तथा अस्पताल प्रशासनले मृत्युको वास्तविक कारण नखुलाएको आरोप लगाउँदै निष्पक्ष छानबिन र दोषीमाथि कारबाहीको माग गरेका छन् ।
मृतकका श्रीमान अरुण कुमार चौधरी-यादव-का अनुसार अमृता असार १७ गते पेटमा असह्य दुखाइ भएपछि उपचारका लागि प्रादेशिक अस्पताल पुगेकी थिइन् । परीक्षणका क्रममा चिकित्सकले उनको पेटमा १० मिलिमिटरको पथरी रहेको जानकारी दिँदै तत्काल शल्यक्रिया गर्नुपर्ने सल्लाह दिएका थिए ।
चिकित्सकको सल्लाहअनुसार असार १८ गते दिउँसो करिब १ः३० बजे अमृतालाई शल्यक्रिया कक्ष -ओटी-मा लगेर अपरेशन गरिएको थियो । परिवारका अनुसार अपरेशन सम्पन्न भएपछि केही घण्टासम्म उनको अवस्था सामान्य देखिएको थियो । तर साँझतिर अचानक पेट अत्यधिक दुख्न थालेपछि स्वास्थ्य अवस्था बिग्रँदै गयो ।
अन्ततः राति करिब १ बजे उनको मृत्यु भयो । श्रीमान अरुण यादवले शल्यक्रियापछि भएको मृत्युबारे चिकित्सकसँग पटक–पटक जानकारी माग्दा स्पष्ट जवाफ नपाएको गुनासो गरेका छन् ।
उनका अनुसार चिकित्सकले हामीलाई पनि बिरामीको मृत्यु कसरी भयो भन्ने थाहा छैन भन्ने जवाफ दिएको आरोप छ । परिवारले मृत्युको कारणबारे लिखित वा मौखिक रूपमा कुनै स्पष्ट जानकारी नपाएको दाबी गरेको छ ।
यादवका अनुसार घटनापछि अस्पताल प्रशासनले तत्काल शव बुझेर लैजान आग्रह गर्दै पछि बसेर छलफल गर्ने आश्वासन दिएको थियो । त्यसअनुसार साउन ५ गते अस्पताल प्रशासन र मृतक पक्षबीच छलफल भए पनि मृत्युको कारणबारे स्पष्ट निष्कर्ष ननिस्किएको उनको भनाइ छ । छलफलमा पनि विभिन्न बहाना मात्रै सुनाइयो ।
अन्ततः अस्पतालले पनि अमृताको मृत्यु किन भयो भन्ने पत्ता लगाउन नसकेको बतायो, यादवले भने । परिवारका अनुसार अमृताको शल्यक्रिया डा. राजेश साहसहितको चिकित्सक टोलीले गरेको थियो ।
तर शल्यक्रियापछि उत्पन्न जटिलता के थियो, उपचारका क्रममा कुनै कमजोरी भयो वा भएन भन्ने विषयमा अस्पतालले आधिकारिक जानकारी नदिएको उनीहरूको आरोप छ ।
घटनापछि मृतकका आफन्तले निष्पक्ष छानबिन गरी मृत्युको वास्तविक कारण सार्वजनिक गर्न, उपचार प्रक्रियाको अनुसन्धान गर्न तथा लापरबाही पुष्टि भए कानुनबमोजिम कारबाही गर्न सम्बन्धित निकायसँग माग गरेका छन् ।
यता यस सम्बन्धमा अस्पताललाई हामीले सम्पर्क गर्न खोजियौ तर सम्पर्कमा आएन ।
