काठमाडौं, ५ असार । कीर्तिपुरको ट्याङ्लाफाँटस्थित चाँदनी चोकमा कारभित्र जलेर मृत्यु भएका व्यक्तिको पहिचान ७० वर्षीय सुरेशचन्द्र श्रेष्ठ रहेको पुष्टि भएको छ ।
नरदेवी घर भएका श्रेष्ठ हाल ट्याङ्लाफाँटमा बस्दै आएका थिए । प्रहरीका अनुसार मंगलबार उनी चलाइरहेको बा.५ च ३०३८ नम्बरको किया कार मा अचानक आगलागी भएको थियो ।
प्रत्यक्षदर्शीका अनुसार सुरुमा कारभित्र सानो आगो देखिएपछि केहीबेरमै आगो दन्किएको थियो । प्रहरी र स्थानीयले आगो नियन्त्रणमा लिए पनि श्रेष्ठको ज्यान जोगिन सकेन ।
शव पोस्टमार्टमका लागि त्रिवि शिक्षण अस्पताल पठाइएको छ भने आगलागीको कारणबारे प्रहरीले अनुसन्धान गरिरहेको छ ।
