काठमाडौं, ५ साउन । युवा, श्रम तथा रोजगारमन्त्री रामजी यादवले वैदेशिक रोजगारीलाई पूर्ण रूपमा रोक्न सम्भव नभएको भन्दै यसको सट्टा सुरक्षित, मर्यादित र व्यवस्थित बनाउन सरकार केन्द्रित रहेको बताएका छन् ।
मंगलबार वैदेशिक रोजगार विभागको अनुगमनका क्रममा उनले विश्वव्यापीकरणको युगमा श्रमिकको अन्तरदेशीय आवागमन स्वाभाविक प्रक्रिया भएकाले वैदेशिक रोजगारी रोक्नु उचित नहुने बताए ।
उनले नेपाली श्रमिकका लागि सुरक्षित कार्यस्थल, उचित पारिश्रमिक र सम्मानजनक श्रम वातावरण सुनिश्चित गर्न युरोपलगायत नयाँ र सुरक्षित श्रम गन्तव्यको खोजी भइरहेको जानकारी दिए ।
मन्त्री यादवले आन्तरिक श्रम बजारमा देखिएका समस्या समाधान गर्न श्रम विभागले छिट्टै अनलाइन प्लेटफर्म सञ्चालनमा ल्याउने पनि बताए ।
