जनकपुर, ४ साउन । मधेस प्रदेशमा नेपाली कांग्रेस, नेकपा एमाले र नेकपाको वर्तमान सत्ता गठबन्धन यथावत् रहने भएको छ ।
तीन दलले सरकार परिवर्तन नगरी मन्त्रालयको संख्या १२ बाट घटाएर ९ मा सीमित गर्ने तथा मन्त्रीहरू हेरफेर गर्ने तयारी गरेका छन् । गठबन्धनका अनुसार अर्को वर्ष हुने स्थानीय तथा प्रदेश निर्वाचनलाई मध्यनजर गर्दै सरकारलाई निरन्तरता दिने सहमति भएको हो ।
साउन १५ भित्र मन्त्रिपरिषद् पुनर्गठन हुन सक्ने र एक वर्ष पूरा गरेका मन्त्रीलाई फिर्ता बोलाएर नयाँ अनुहार पठाइने तयारी छ । मन्त्रालय पुनर्संरचनासँगै कांग्रेस र एमालेले ३/३ तथा नेकपाले २ मन्त्रालय पाउने प्रारम्भिक सहमति भएको छ ।
साथै, प्रदेश सरकारले चालु आर्थिक वर्षका सबै विकास योजनाको ठेक्का खुला प्रतिस्पर्धाबाट गराउने र भदौदेखि टेन्डर प्रक्रिया अघि बढाउने तयारी गरेको जनाएको छ ।
