काठमाडौं, ३ असार । नेपाली कांग्रेसभित्रको आन्तरिक विवाद समाधानका लागि संस्थापन पक्षसँग भएका वार्ता निष्कर्षविहीन बनेपछि संस्थापन इतर -नियमित महाधिवेशन पक्षधर- समूहले साउनभित्र काठमाडौंमा राष्ट्रिय भेला आयोजना गर्ने निर्णय गरेको छ ।
पत्रकार सम्मेलनमा नेता मिन विश्वकर्माले पार्टी एकताका लागि पटक–पटक संवाद भए पनि नेतृत्वबाट आवश्यक लचकता, धैर्यता र सकारात्मक पहल नदेखिएकाले सहमति हुन नसकेको बताए ।
उनले सानेपास्थित पार्टी नेतृत्वले अधिकार केन्द्रित ढंगले काम गरेको आरोप लगाउँदै अब प्रतीक्षामा नबसी नयाँ कार्यदिशा तय गर्न राष्ट्रिय भेला गर्ने निर्णय गरिएको जानकारी दिए ।
साथै, बीपी स्मृति दिवस भने विगतझैँ मनाइने र सम्पर्क कार्यालयबाट गतिविधि निरन्तर सञ्चालन हुने बताए ।
