काठमाडौँ, ३ साउन । नेकपा -एमाले) का अध्यक्ष तथा पूर्वप्रधानमन्त्री केपी शर्मा ओलीले वर्तमान सरकार हत्याहिंसा, तोडफोड, कब्जा र आगजनीको आधारमा बनेको आरोप लगाएका छन् ।
पार्टीको संसदीय मामिला विभागले आइतबार पार्टी केन्द्रीय कार्यालयमा आयोजना गरेको सांसदहरूसँगको अन्तरक्रिया कार्यक्रममा बोल्दै अध्यक्ष ओलीले नेपालको वर्तमान राजनीतिक अवस्था दिशाविहीन, विधिहीन र थितिविहीन बन्दै गएको टिप्पणी गरे ।
उनले लोकतान्त्रिक व्यवस्थामा सरकार परिवर्तनका लागि कानुनी र संवैधानिक प्रक्रिया हुने उल्लेख गर्दै वर्तमान सरकार भने त्यस्ता लोकतान्त्रिक मूल्य र मान्यताभन्दा बाहिर गएर बनेको दाबी गरे ।
अहिलेको राजनीति परिभाषाविहीन, दिशाविहीन र थितिविहीन ढङ्गले चलिरहेको छ, अध्यक्ष ओलीले भने, लोकतन्त्रमा सरकार परिवर्तन गर्ने कानुनी र संवैधानिक बाटा हुन्छन्।
तर अहिलेको सरकार हत्याहिंसा, तोडफोड, कब्जा र आगजनीको आधारबाट बनेको हो । अध्यक्ष ओलीले गत भदौ २३ र २४ पछि मुलुकको राजनीति झन् दिशाहीन बनेको दाबी गर्दै लोकतान्त्रिक प्रक्रिया, विधि र संस्थागत अभ्यासलाई सुदृढ बनाउनुपर्ने आवश्यकता रहेको बताए ।
