सर्लाही, ३ साउन । सर्लाही सदरमुकाम मलंगवास्थित नेपाल टेलिकमको टावरमा चढेका एक युवकको सुरक्षाकर्मीको सक्रियता र परिवारसँगको संवादपछि सकुशल उद्धार गरिएको छ ।
गोडैता नगरपालिका–९ बकैनिया निवासी २४ वर्षीय अफसर आलम हुसैन टावरमा चढेका थिए । जिल्ला प्रहरी कार्यालय सर्लाहीका अनुसार उनका बुवा र दाजुलाई घटनास्थलमा बोलाएर टेलिफोनमार्फत् हुसैनसँग कुरा गराइएपछि उनी स्वेच्छाले टावरबाट तल ओर्लिएका हुन् ।
प्रहरीका अनुसार हुसैन रातिकै समयमा टावरमा चढेको हुनसक्ने अनुमान गरिएको छ । बिहान करिब ४ बजे उनले आफ्ना एक साथीलाई फोन गरेर बोलाएपछि घटनाबारे जानकारी प्राप्त भएको थियो ।
घटनालगत्तै नेपाल प्रहरी, सशस्त्र प्रहरी बल र नेपाली सेनाको संयुक्त उद्धार टोली परिचालन गरिएको थियो । सुरक्षाकर्मीको समन्वय र परिवारको पहलपछि कुनै अप्रिय घटना नहुँदै उनको सफल उद्धार गरिएको प्रहरीले जनाएको छ ।
युवक टावरमा किन चढेका थिए भन्ने कारण भने हालसम्म खुल्न सकेको छैन । घटनाबारे थप अनुसन्धान भइरहेको प्रहरीले जनाएको छ ।
