राजबिराज, २ साउन । सप्तरीको राजबिराजस्थित जिल्ला कारागारमा जेलर रूपक मण्डलको सरुवा र घटनाको निष्पक्ष छानबिनको माग गर्दै कैदीबन्दीहरूले तीन दिनदेखि आन्दोलन गरेका छन् ।
कैदीबन्दीहरूले चौकीदार नियुक्तिका नाममा आर्थिक अनियमितता भएको आरोप लगाउँदै विरोध जनाएका हुन् । आन्दोलन नियन्त्रणका क्रममा प्रहरीले बल प्रयोग गरेपछि केही कैदीबन्दीले शरीरमा मट्टीतेल खन्याएर आत्मदाहको प्रयास गरेका थिए, त्यसपछि प्रहरी पछि हटेको बताइएको छ ।
एक कैदीले चौकीदार बनाइदिने भन्दै जेलरको नाममा पाँच लाख रुपैयाँ घुस लिइएको आरोप लगाएका छन् । घटनापछि कारागारमा नेपाल प्रहरी र सशस्त्र प्रहरी परिचालन गरिएको छ भने सञ्चारकर्मीलाई समेत प्रवेशमा रोक लगाइएको थियो ।
प्रमुख जिल्ला अधिकारी रामकृष्ण थापाले प्रहरी कारागारभित्र प्रवेश गर्न खोज्दा कैदीबन्दीले मट्टीतेल खन्याएको स्वीकार गर्दै अहिले अवस्था सामान्य बन्दै गएको जानकारी दिएका छन् । उनका अनुसार चौकीदारको व्यवहारलाई लिएर विवाद उत्पन्न भएको हो ।
