जनकपुर, २ साउन । सरकारले जनकपुर उपमहानगरपालिकाभित्र रहेका राजगुठीअन्तर्गतका पोखरी तथा तिनका डिल क्षेत्रमा भएको अतिक्रमण सात दिनभित्र हटाउन निर्देशन दिएको छ।
गुठीको जग्गा संरक्षण तथा व्यवस्थापनका लागि गठित कार्यान्वयन समितिले विशहरा पोखरी, दशरथ तालाउ, रत्न सागर, मुरली सर, गोडधोई पोखरीलगायतका जलाशय र डिल क्षेत्रमा रहेका अनधिकृत संरचना हटाउन सार्वजनिक सूचना जारी गरेको हो।
समितिका अनुसार विभिन्न व्यक्ति तथा संस्थाले गुठी जग्गामा अनधिकृत रूपमा संरचना निर्माण गरी भोगचलन गर्दै आएका छन्।
तोकिएको सात दिनभित्र अतिक्रमण नहटाए प्रचलित कानुनअनुसार हटाउने र आवश्यक कानुनी कारबाही गरिने चेतावनी दिइएको छ।
सरकारले जनकपुरधामका गुठी जग्गा, पोखरी तथा अन्य सार्वजनिक सम्पत्तिको संरक्षणलाई प्राथमिकताका साथ अघि बढाएको जनाएको छ।
