काठमाडौं, २ साउन । ल्हेन्दे खोलाको बाढी आएको एक वर्ष बितिसक्दा रसुवाको टिमुरे भन्सारमा आयात–निर्यात गतिविधि सामान्य अवस्थामा फर्किए पनि करिब २ अर्ब १६ करोड रुपैयाँ लागतको निर्माणाधीन सुक्खा बन्दरगाह अझै पुनर्निर्माण हुन सकेको छैन ।
करिब ८० प्रतिशत निर्माण सम्पन्न भइसकेको बन्दरगाहमा बाढीले गोदाम, यार्ड, पार्किङ र तटबन्धमा ठूलो क्षति पु¥याएको थियो । त्यसपछि चिनियाँ निर्माण कम्पनी काममा नफर्किएको तथा नेपाल सरकारले पनि पुनर्निर्माणबारे ठोस निर्णय गर्न नसकेको नेपाल इन्टरमोडल यातायात विकास समितिले जनाएको छ ।
हाल बाढीबाट जोगिएका अस्थायी संरचनाबाटै भन्सार जाँच र व्यापार सञ्चालन भइरहेको छ । मितेरी पुलको स्थानमा चीनले निर्माण गरेको बेलीब्रिजमार्फत आवतजावत र ढुवानी भइरहे पनि सीमित भार क्षमताका कारण व्यापारमा कठिनाइ रहेको भन्सार कार्यालयले जनाएको छ ।
प्रारम्भिक मूल्यांकनअनुसार बाढीले बन्दरगाहमा ९१ करोड २० लाख रुपैयाँ तथा भन्सार यार्ड, मालवस्तु र उपकरणमा करिब ७० करोड ५१ लाख रुपैयाँ क्षति पु¥याएको थियो ।
बाढीबाट प्रभावित अन्य पूर्वाधारमध्ये अधिकांश पुनः सञ्चालनमा आए पनि सुक्खा बन्दरगाह, भन्सार यार्ड र रसुवागढी सडकखण्डको पुनर्निर्माण अझै अन्योलमै रहेको छ ।
