काठमाडौं, ३० असार । नक्कली भुटानी शरणार्थी प्रकरणमा दोषी ठहरिएका पूर्वउपप्रधान तथा पूर्वमन्त्री टोपबहादुर रायमाझी र पूर्वगृहमन्त्री बालकृष्ण खाणलाई जिल्ला अदालत काठमाडौंले क्रमशः ४ वर्ष र २ वर्ष कैद सजाय सुनाएको छ ।
न्यायाधीश तेजबहादुर खड्काको इजलासले मंगलबार सजाय निर्धारण गरेको हो । अदालतले रायमाझीलाई ठगी कसुरमा २ वर्ष कैद र २० हजार रुपैयाँ जरिबाना, संगठित अपराधमा ३ वर्ष कैद र ३० हजार रुपैयाँ जरिबाना तथा राज्यविरुद्धको कसुरमा १ वर्ष ६ महिना कैद र १५ हजार रुपैयाँ जरिबाना तोकेको छ ।
सोही कसुरमा थप ६ महिनाको कैद सजायसमेत निर्धारण गरिएको छ । सबै सजायलाई एकीकृत गर्दै उनलाई अन्तिम रूपमा ४ वर्ष कैद र ४० हजार रुपैयाँ जरिबाना हुने फैसला भएको हो ।
यस्तै, पूर्वगृहमन्त्री बालकृष्ण खाणलाई ठगी कसुरमा १ वर्ष कैद र १० हजार रुपैयाँ जरिबाना, संगठित अपराधमा १ वर्ष ६ महिना कैद र १५ हजार रुपैयाँ जरिबाना तथा राज्यविरुद्धको कसुरमा ६ महिना कैद र ५ हजार रुपैयाँ जरिबाना तोकिएको छ ।
सोही कसुरमा थप ३ महिनाको कैद सजायसमेत निर्धारण गरिएको भए पनि एकीकृत सजायअनुसार उनले २ वर्ष कैद र २० हजार रुपैयाँ जरिबाना८८ भोग्नुपर्ने अदालतको फैसला छ ।
यसअघि असार २४ गते अदालतले उक्त प्रकरणमा फैसला सुनाउँदै १६ जनालाई दोषी र ७ जनालाई निर्दोष ठहर गरेको थियो । दोषी ठहर हुनेमा टोपबहादुर रायमाझी, बालकृष्ण खाण, टेकनारायण पाण्डे, केशवप्रसाद दुलाल, सानु भण्डारी, सागर राई, सन्देश शर्मा, डा. इन्द्रजीत राई, गोविन्दकुमार चौधरी -विक्रम- आङटावा शेर्पा, टेकनाथ रिजाल, नरेन्द्र केसी, शमशेर मियाँ, हरिभक्त महर्जन, निरञ्जनकुमार खरेल र बेचन झा रहेका छन् ।
त्यसैगरी, रामशरण केसी, टंककुमार गुरुङ, सन्दीप रायमाझी, प्रतीक थापा, लक्ष्मी महर्जन, केशव तुलाधर र आशिष बुढाथोकीले भने अदालतबाट सफाइ पाएका छन् ।
