काठमाडौं, ३० असार। सर्लाहीको गोडैता नगरपालिका–१० सिसौटियाका ३४ वर्षीय विवेक मण्डलको आत्मदाह प्रयासपछि उपचारका क्रममा मृत्यु भएको छ।
असार २५ गते शरीरमा पेट्रोल खन्याएर आत्मदाहको प्रयास गरेका मण्डलको कीर्तिपुरस्थित बर्न अस्पतालमा उपचार भइरहेका बेला सोमबार राति करिब २ बजे निधन भएको हो।
घटनापछि उनलाई सुरुमा प्रादेशिक अस्पताल मलंगवामा प्राथमिक उपचार गरिएको थियो।
स्वास्थ्य अवस्था गम्भीर बनेपछि शुक्रबार नेपाली सेनाको हेलिकोप्टरमार्फत काठमाडौंस्थित कीर्तिपुर बर्न अस्पताल ल्याइएको थियो।
प्रहरीका अनुसार मण्डल बिहीबार दिउँसो घरबाट निस्किएपछि सडकमा पुगेर आफ्नै शरीरमा पेट्रोल खन्याई आगो लगाएका थिए।
उपचारका सबै प्रयासका बाबजुद उनको ज्यान बचाउन नसकिएको अस्पताल स्रोतले जनाएको छ।
यसअघि आत्मदाहको प्रयास गरेका गणेश नेपाली र आश्विन राउतको पनि उपचारकै क्रममा मृत्यु भइसकेको छ।
