काठमाडौं, २९ असार । विभिन्न सञ्चारगृह तथा सार्वजनिक स्थानका गेटमा शंकास्पद रूपमा पार्किङ गरिएका सबै सवारीसाधन प्रहरीले सम्बन्धित धनीलाई जिम्मा लगाएको छ ।
सोमबार बिहान कान्तिपुर पब्लिकेसन, अनलाइनखबर, हिमालयन टेलिभिजन, कांग्रेस सभापति गगन थापाको निवास अगाडि तथा भाटभटेनी क्षेत्रबाट फेला परेका गाडीहरू ट्राफिक प्रहरीले क्रेनमार्फत नियन्त्रणमा लिएर कार्यालय पु¥याएको थियो ।
प्रहरीका अनुसार ती सवारीधनीलाई जथाभावी पार्किङ गरेको कसुरमा ५ सयदेखि १ हजार ५ सय रुपैयाँसम्म जरिवाना गराई गाडी फिर्ता गरिएको हो ।
केही सवारी चालक र केही गाडीधनी स्वयं साँझ ट्राफिक प्रहरी कार्यालय पुगेर आफ्नो सवारी बुझेका थिए । अनुसन्धानका क्रममा भाटभटेनीमा पार्किङ गरिएको बागमती प्रदेश–०१–०३३ च ४२७५ नम्बरको हुण्डाई क्रेटा, अनलाइनखबरको गेटमा राखिएको बा १२ च ८५४५ नम्बरको कार सुनिल पौडेलको रहेको खुल्यो ।
उक्त कार उनका भाइले त्यहाँ छाडेको प्रहरीले जनाएको छ । यस्तै, कान्तिपुर पब्लिकेसनको गेटमा पार्किङ गरिएको बा प्रदेश–०१–०३४ च ४० नम्बरको जिप रास्वपासँग आबद्ध नेता रवि जैसवालको भएको पुष्टि भएको छ ।
हिमालयन टेलिभिजन अगाडि भेटिएको बा १० च १२५५ नम्बरको कार भने डीआर अटो मोटिभ्सको नाममा दर्ता रहेको प्रहरीले जनाएको छ । प्रहरीका अनुसार नियन्त्रणमा लिइएका सबै सवारीसाधन सम्बन्धित व्यक्तिले जिम्मा लिइसकेका छन् ।
