काठमाडौं, २९ असार । नेपाली कांग्रेसका सभापति गगनकुमार थापाको रातोपुलस्थित निवासअगाडि पनि सोमबार शंकास्पद रूपमा गाडी पार्किङ गरिएको पाइएको छ ।
बाटो नै अवरुद्ध हुने गरी गाडी राखिएको सूचना प्राप्त भएपछि प्रहरीले तत्काल घटनास्थलमा टोली परिचालन गरेको छ । जिल्ला प्रहरी परिसर काठमाडौंका प्रवक्ता एसपी पवनकुमार भट्टराईका अनुसार थापा निवासअगाडि बीएसी ९५७५ नम्बरको गाडी फेला परेको हो ।
उक्त गाडी कसले र कुन उद्देश्यले त्यहाँ राखेको भन्ने विषयमा अनुसन्धान सुरु गरिएको प्रहरीले जनाएको छ । यसअघि कान्तिपुर पब्लिकेशन, अनलाइनखबर, हिमालय टेलिभिजनको कार्यालय तथा अनामनगरस्थित भाटभटेनी सुपरमार्केटअगाडि पनि शंकास्पद रूपमा गाडी पार्किङ गरिएको थियो ।
ती सबै सवारी प्रहरीले क्रेनको सहयोगमा हटाएर उपत्यका ट्राफिक प्रहरी कार्यालयमा लगेको छ । प्रहरीका अनुसार सबै घटनाबारे एकीकृत रूपमा अनुसन्धान भइरहेको छ र गाडी पार्किङ गर्ने व्यक्ति तथा त्यसको उद्देश्य खुल्न बाँकी छ ।
