काठमाडौं, २९ असार । राजधानीका विभिन्न सञ्चारगृह र अनामनगरस्थित भाटभटेनी सुपरमार्केटबाहिर सोमबार बिहान शंकास्पद रूपमा सवारीसाधन पार्किङ गरिएपछि प्रहरीले सुरक्षा सतर्कता बढाएको छ ।
तीनकुनेस्थित कान्तिपुर पब्लिकेशन, नयाँबानेश्वरस्थित अनलाइनखबर र मध्यबानेश्वरस्थित हिमालय टेलिभिजनको गेटअघि गाडी राखिएको थियो ।
कान्तिपुरअगाडिको गाडी प्रहरीले क्रेनमार्फत हटाएको छ भने अन्य सवारीका धनीको खोजी गर्दै घटनाबारे अनुसन्धान भइरहेको जनाएको छ ।
यस घटनाप्रति नेपाल पत्रकार महासंघले पनि ध्यानाकर्षण जनाउँदै सञ्चारगृहमा हुने अवरोध तत्काल हटाउन, सञ्चारकर्मीको सुरक्षा सुनिश्चित गर्न र घटनाको निष्पक्ष छानबिन गरी दोषीमाथि कानुनी कारबाही गर्न माग गरेको छ ।
