काठमाडौं, २८ असार । गणेश नेपालीको आत्मदाह घटनासम्बन्धी सोधपुछका लागि बोलाइएका सबै व्यक्तिलाई प्रहरीले शुक्रबार नै छाडेको छ ।
जिल्ला प्रहरी परिसर काठमाडौंका एसपी पवनकुमार भट्टराईका अनुसार उनीहरूलाई पक्राउ नभई आवश्यक सोधपुछ र घटना विवरण लिएपछि रिहा गरिएको हो ।
त्रिपुरेश्वरस्थित राहदानी विभागअघि मोटरसाइकलमा ह्वीललक लगाएको विषयमा विवाद भएपछि नेपालीले आफ्नै शरीरमा पेट्रोल छर्केर आगो लगाएका थिए ।
उपचारका क्रममा उनको भोलिपल्ट वीर अस्पतालमा मृत्यु भएको थियो । घटनाको छानबिनका लागि काठमाडौं उपत्यका प्रहरी कार्यालयले डीआईजी गोविन्द थपलियाको नेतृत्वमा पाँच सदस्यीय समिति गठन गरेको छ ।
