काठमाडौं, २७ असार । आत्मदाहपछि उपचारका क्रममा ज्यान गुमाएका मुगुका गणेश नेपालीको न्यायको माग गर्दै शनिबार काठमाडौंस्थित वीर अस्पताल अगाडि प्रदर्शन गरिएको छ ।
प्रदर्शनकारीहरूले सरकार र सत्तारुढ राष्ट्रिय स्वतन्त्र पार्टी -रास्वपा) विरुद्ध नाराबाजी गर्दै घटनाको निष्पक्ष छानबिन, दोषीमाथि कारबाही र पीडित परिवारलाई न्यायको माग गरेका छन् ।
प्रदर्शनका क्रममा प्रधानमन्त्री बालेन शाह र रास्वपा सभापति रवि लामिछानेको नाम उल्लेख गर्दै नाराबाजी गरिएको थियो । प्रदर्शनलाई मध्यनजर गर्दै वीर अस्पताल आसपासको क्षेत्रमा सुरक्षा व्यवस्था कडा पारिएको छ ।
सम्भावित अप्रिय घटना रोक्न उल्लेख्य संख्यामा सुरक्षाकर्मी परिचालन गरिएको प्रहरीले जनाएको छ । यता, गणेश नेपालीका आफन्तले हालसम्म शव बुझेका छैनन् ।
पोस्टमार्टमका लागि उनको शव त्रिभुवन विश्वविद्यालय शिक्षण अस्पतालमा राखिएको छ । घटनापछि सरकारले शुक्रबारदेखि नै मृतकका परिवारसँग वार्ता गरिरहेको भए पनि हालसम्म कुनै सहमति हुन सकेको छैन ।
पीडित पक्षले न्याय सुनिश्चित नभएसम्म आन्दोलन जारी राख्ने चेतावनी दिएको छ ।
