काठमाडौं, २६ असार । मुगुका २५ वर्षीय गणेश नेपालीको उपचारका क्रममा मृत्यु भएपछि शुक्रबार वीर अस्पताल परिसरमा प्रदर्शन भएको छ ।
प्रदर्शनकारीहरूले घटनाको नैतिक जिम्मेवारी लिँदै प्रधानमन्त्री बालेन शाह र गृहमन्त्री सुधन गुरुङको राजीनामा माग गरेका छन् । प्रदर्शनकारीहरूले सरकारविरुद्ध नाराबाजी गर्दै घटनाको निष्पक्ष छानबिन, दोषीमाथि कडा कारबाही तथा पीडित परिवारलाई उचित क्षतिपूर्ति र न्यायको व्यवस्था गर्न माग गरेका छन् ।
प्रदर्शनका कारण केही समय अस्पताल परिसर तनावग्रस्त बनेको थियो भने सुरक्षा व्यवस्था पनि कडा पारिएको थियो । गणेश नेपालीले बिहीबार काठमाडौं महानगरपालिकाका नगर प्रहरीसँग भएको विवादपछि आफ्नै शरीरमा पेट्रोल छर्केर आत्मदाहको प्रयास गरेका थिए।
गम्भीर रूपमा घाइते भएका उनलाई तत्काल उद्धार गरी वीर अस्पतालमा भर्ना गरिएको थियो । शरीरको ठूलो भाग जलेका नेपालीको चिकित्सकहरूको टोलीले सघन उपचार गरिरहेको थियो ।
तर उपचारकै क्रममा शुक्रबार उनको मृत्यु भएको अस्पताल स्रोतले जनाएको छ । नेपालीको मृत्युपछि घटनाप्रति आक्रोश व्यक्त गर्दै विभिन्न व्यक्तिहरू वीर अस्पताल पुगेका थिए ।
उनीहरूले घटनाको सम्पूर्ण सत्य सार्वजनिक गर्न, जिम्मेवार पक्षमाथि कानुनी कारबाही गर्न तथा यस्ता घटना भविष्यमा दोहोरिन नदिन सरकारसँग प्रभावकारी कदम चाल्न माग गरेका छन् ।
यस घटनाबारे सरकारले हालसम्म औपचारिक प्रतिक्रिया सार्वजनिक गरेको छैन ।
