काठमाण्डौं, २४ असार । भूमि व्यवस्था, सहकारी तथा गरिबी निवारण मन्त्रालयले धनुषास्थित बृहत्तर जनकपुर क्षेत्रका गुठी जग्गा, रामजानकी मन्दिर, मठ–मन्दिर, पोखरी तथा पोखरीका डिलको संरक्षण र अतिक्रमण हटाउन ९ सदस्यीय कार्यान्वयन समिति गठन गरेको छ ।
मन्त्रालयले गुठी संस्थान प्रधान कार्यालयका गुठी प्रशासक ध्रुव घिमिरेको संयोजकत्वमा समिति गठन गरेको हो । समितिमा जिल्ला प्रशासन कार्यालय धनुषाका सहायक प्रमुख जिल्ला अधिकारी, जिल्ला समन्वय समिति धनुषाका जिल्ला समन्वय अधिकारी, भूमि व्यवस्थापन तथा अभिलेख विभागका निर्देशक, भूमि प्रशासन कार्यालय धनुषाका प्रमुख भूमि प्रशासन अधिकृत, नापी कार्यालय धनुषाका प्रमुख नापी अधिकृत तथा गुठी संस्थान शाखा कार्यालय धनुषाका प्रमुखलगायत सदस्य रहेका छन् ।
मन्त्रालयका अनुसार बृहत्तर जनकपुर क्षेत्रअन्तर्गत रहेका रामजानकी मन्दिर, विभिन्न मठ–मन्दिर, पोखरी, पोखरीका डिल तथा गुठी जग्गाको संरक्षण र व्यवस्थापनका लागि यसअघि तयार भएका विभिन्न प्रतिवेदनको प्रभावकारी कार्यान्वयन गर्ने उद्देश्यले समिति गठन गरिएको हो ।
समितिलाई उच्चस्तरीय कार्यदल–२०६२, सरकारी, सार्वजनिक तथा गुठी जग्गा संरक्षण सम्बन्धी जाँचबुझ आयोग–२०७६ लगायतका प्रतिवेदनमा उल्लेख गरिएका सिफारिस कार्यान्वयन गर्ने जिम्मेवारी दिइएको छ ।
समितिले मन्दिर परिसर, पोखरी तथा पोखरीका डिलमा भएको अतिक्रमण पहिचान गरी सम्बन्धित व्यक्तिलाई सात दिनभित्र स्वेच्छाले जग्गा खाली गर्न सूचना जारी गर्नेछ ।
त्यसैगरी अन्य गुठी जग्गामा घरटहरा निर्माण गरी बसोबास गरिरहेका व्यक्तिलाई १५ दिनभित्र अतिक्रमण हटाउन सूचना दिइनेछ । तोकिएको समयभित्र अतिक्रमण नहटाएमा स्थानीय प्रशासन र सम्बन्धित स्थानीय तहसँग समन्वय गरी थप १५ दिनभित्र अतिक्रमण हटाइने मन्त्रालयले जनाएको छ ।
अतिक्रमण हटाउने कार्य सम्पन्न भएपछि समितिले १५ दिनभित्र प्रगति प्रतिवेदन मन्त्रालयमा बुझाउनेछ ।
