काठमाडौं, २३ असार । नेपाल भ्रमणमा रहेका एसियाली विकास बैंक (एडीबी)का अध्यक्ष मासातो कान्दाले प्रधानमन्त्री बालेन्द्र शाहसँग भेट गर्दै नेपालको आर्थिक विकास, रोजगारी सिर्जना र लगानी विस्तारमा एडीबीले सहयोग अझ सुदृढ बनाउने प्रतिबद्धता व्यक्त गरेका छन्।
भेटका क्रममा सन् २०२९ सम्म नेपाललाई २ अर्ब ४० करोड अमेरिकी डलर बराबरको सहयोग उपलब्ध गराउने योजना रहेको जानकारी दिइएको छ। साथै, नेपाल र एडीबीबीच करिब २५ अर्ब रुपैयाँ (१६ करोड ५० लाख अमेरिकी डलर) बराबरको सहुलीयतपूर्ण ऋण सम्झौतामा हस्ताक्षर भएको छ। उक्त रकम सुरक्षित खानेपानी, ढल व्यवस्थापन तथा व्यापार सहजीकरणसम्बन्धी परियोजनामा खर्च गरिनेछ।
भ्रमणका क्रममा अध्यक्ष कान्दाले एडीबीको सहयोगमा सञ्चालित विभिन्न विकास आयोजना, पुनर्निर्मित विद्यालय तथा ऊर्जा पूर्वाधारको अवलोकन गरेका छन्। उनले नेपालसँगको ६० वर्षभन्दा लामो विकास साझेदारीलाई अझ प्रभावकारी बनाउँदै दिगो आर्थिक वृद्धि र पूर्वाधार विकासमा सहकार्य जारी रहने विश्वास व्यक्त गरेका छन्।
