काठमाडौं, २३ असार । सम्पत्ति शुद्धीकरण अनुसन्धान विभागले नेपाली कांग्रेसका सभापति तथा पूर्वप्रधानमन्त्री शेरबहादुर देउवाका छोरा जयवीर देउवालाई सात दिनभित्र विभागमा उपस्थित हुन निर्देशन दिँदै पुर्जी जारी गरेको छ ।
विभागले सम्पत्ति शुद्धीकरणसम्बन्धी जाँचबुझका क्रममा केही विषयमा बयान तथा जानकारी आवश्यक रहेकाले सात दिनभित्र उपस्थित हुन पुर्जीमार्फत सूचना दिएको जनाएको छ ।
जारी गरिएको पुर्जी काठमाडौंको बुढानीलकण्ठस्थित जयवीर देउवाको निवासमा समेत टाँस गरिएको छ । यसअघि विभागले पूर्वप्रधानमन्त्री शेरबहादुर देउवा र उनकी पत्नी आरजु राणा देउवालाई पनि उपस्थित हुन बोलाइसकेको थियो ।
देउवा दम्पतीले विभागलाई साउन मसान्तभित्र उपस्थित हुने जानकारी गराएको स्रोतले जनाएको छ । विभागले यस प्रकरणमा आवश्यक अनुसन्धान प्रक्रिया अघि बढाइरहेको जनाएको छ ।
