काठमाडौं, ११ असार । भारतीय टी बोर्डको अवरोधका कारण बन्द भएका इलामको सूर्योदय नगरपालिकाका ५३ वटा चिया उद्योग पुनः सञ्चालनमा आएका छन् ।
नेपाली चिया निर्यातमा समस्या आएपछि असार १ गतेदेखि उद्योग बन्द भएका थिए । सूर्योदय नगरपालिका र संघीय सरकारले समस्या समाधानका लागि पहल गर्ने प्रतिबद्धता जनाएपछि उद्योगीहरूले उद्योग सञ्चालन गर्ने तथा किसानबाट हरियो चिया पत्ती खरिद पुनः सुरु गर्ने निर्णय गरेका हुन् ।
सरकारले चिया निर्यात समस्या समाधानका लागि उच्चस्तरीय कार्यदल गठन गरेको छ भने स्थानीय तहले चिया भण्डारणका लागि गोदाम उपलब्ध गराउने आश्वासन दिएको छ ।
उद्योगीहरूले गुणस्तरीय तथा विषादीरहित चिया उत्पादनलाई प्राथमिकता दिने र वैकल्पिक अन्तर्राष्ट्रिय बजार विस्तारमा पहल गर्ने बताएका छन् ।
