काठमाडौं, ६ असार । काठमाडौंको बालकुमारी क्षेत्रमा लागूऔषध नियन्त्रण अभियानका क्रममा नेपाल प्रहरीले गोली प्रहार गरी तीन जनालाई पक्राउ गरेको छ ।
पक्राउ परेकामध्ये एक जनालाई गोली लागेको छ । शनिबार अपराह्न लागूऔषध नियन्त्रण ब्युरोको टोलीले काठमाडौं महानगरपालिका–३२ अन्तर्गत बालकुमारी पुलमुनि सुरक्षा जाँच गरिरहेको अवस्थामा केही व्यक्तिमाथि शंका लागेपछि खानतलासी गरेको थियो ।
सो क्रममा एक जना व्यक्ति नियन्त्रणबाट भाग्न खोजेपछि प्रहरीले गोली चलाउनुपरेको जनाएको छ । प्रहरीको गोली लागेर पर्साको पटेर्वा सुगौली गाउँपालिका–४ निवासी ३९ वर्षीय किशोरीप्रसाद ओझैया घाइते भएका छन् ।
उनको दाहिने खुट्टाको पिँडौलामा गोली लागेको र हाल वीर अस्पतालमा उपचार भइरहेको प्रहरीले जनाएको छ । ब्युरोका अनुसार पक्राउ परेका व्यक्तिहरू लागूऔषध ब्राउन सुगरसहित फरार हुने प्रयास गरेपछि बल प्रयोग गर्नुपरेको हो ।
घटनास्थलबाट किशोरीप्रसाद ओझैयासहित तीन जनालाई नियन्त्रणमा लिइएको छ । प्रहरीले उनीहरूको साथबाट करिब २९६ ग्राम ब्राउन सुगर बरामद गरेको जनाएको छ ।
पक्राउ परेकामाथि लागूऔषध सम्बन्धी कसुरमा थप अनुसन्धान भइरहेको प्रहरीले जनाएको छ ।
