काठमाडौं, ६ असार । कोसी प्रदेशका केही स्थानमा मनसुनी वायुको प्रभाव देखिएको छ भने देशका अन्य क्षेत्रमा पश्चिमी, स्थानीय तथा पूर्वी वायुको आंशिक प्रभाव रहेको मौसम पूर्वानुमान महाशाखाले जनाएको छ ।
महाशाखाका अनुसार आज दिउँसो र राति देशका विभिन्न स्थानमा मेघगर्जन, चट्याङसहित मध्यमदेखि भारी वर्षाको सम्भावना छ । कोसी, बागमती, गण्डकी, लुम्बिनी, कर्णाली र सुदूरपश्चिमका हिमाली तथा पहाडी क्षेत्रमा वर्षा हुने सम्भावना रहेको छ भने मधेस र कोसीका तराई क्षेत्रमा पनि वर्षा हुन सक्छ ।
कोसी र गण्डकी प्रदेशका केही पहाडी तथा तराई क्षेत्रमा राति भारी वर्षाको सम्भावना रहेको महाशाखाले जनाएको छ। यता लुम्बिनी र सुदूरपश्चिमका केही तराई क्षेत्रमा तातो लहरको प्रभाव कायम रहने सम्भावना छ । मौसमविद्का अनुसार काठमाडौं उपत्यकामा आज हल्कादेखि मध्यम वर्षा हुन सक्छ ।
दिउँसोपछि बादल बढ्दै गएर वर्षाको सम्भावना रहेको छ । यसैबीच, असार ५ गते कोसी प्रदेशका केही स्थानबाट मनसुन भित्रिसकेको छ ।
यस वर्ष मनसुन नेपालमा औसत मितिभन्दा ६ दिन ढिला प्रवेश गरेको हो र अब क्रमशः पश्चिमतर्फ फैलिने मौसमविद्ले बताएका छन् ।
