काठमाडौं, ५ असार । अर्थमन्त्री डा. स्वर्णिम वाग्लेले नेपालका लागि वैदेशिक ऋण लिनु बाध्यता भएको बताएका छन् ।
शुक्रबार प्रतिनिधिसभामा राष्ट्र ऋण उठाउने विधेयक, २०८३ माथिको छलफलका क्रममा उठेका प्रश्नको जवाफ दिँदै उनले उत्पादनमूलक क्षेत्रमा लगानीका लागि ऋण आवश्यक रहेको बताए ।
उनले ऋण लिँदैमा अर्थतन्त्र संकटमा नपर्ने उल्लेख गर्दै सडक, प्रसारण लाइन लगायत पूर्वाधार विकासमा गरिएको लगानीबाट आर्थिक वृद्धि र आम्दानी सिर्जना हुने बताए ।
ऋणको सदुपयोग महत्त्वपूर्ण भएको उल्लेख गर्दै उनले नेपालले विगत ६५ वर्षदेखि वैदेशिक ऋण लिँदै आएको र अर्थतन्त्रको क्षमता बढ्दै गए वैदेशिक ऋण नकारात्मक नहुने धारणा राखे ।
