काठमाडौं, ४ आसार । राष्ट्रिय परीक्षा बोर्डले कक्षा–१२ को नतिजा यसै साता सार्वजनिक गर्ने तयारीलाई तीव्र बनाएका छन् ।
बोर्डका अनुसार नतिजा प्रकाशनसम्बन्धी अधिकांश काम सम्पन्न भइसकेको छ र प्रक्रिया अन्तिम चरणमा पुगेको छ । बोर्डकी प्रवक्ता जयन्ती सत्यालले प्राविधिक समस्या नआए यसै हप्ताभित्र नतिजा सार्वजनिक गरिने बताएकी छन् ।
उनका अनुसार नतिजा तयारीको काम अन्तिम अवस्थामा पुगेको छ । सरकारले कक्षा–१२ को नतिजा परीक्षा सम्पन्न भएको ४५ दिनभित्र सार्वजनिक गर्न निर्देशन दिएको छ ।
यस वर्ष परीक्षा वैशाख १४ देखि २७ गतेसम्म सञ्चालन भएको थियो । बोर्डका तथ्यांकअनुसार परीक्षामा देशभरबाट ४ लाख १८ हजारभन्दा बढी विद्यार्थी सहभागी भएका थिए ।
