काठमाडौं, ४ असार । अर्थमन्त्री डा. स्वर्णिम वाग्लेले प्रधानमन्त्री तथा मन्त्रिपरिषद् कार्यालयको बजेट विवरणमा केही रकमको हिसाब नमिलेको स्वीकार गरेका छन् ।
प्रतिनिधिसभामा सांसदहरूले उठाएका प्रश्नको जवाफ दिँदै उनले सूचना प्रविधि विभाग र राष्ट्रिय साइबर सुरक्षा केन्द्रका केही पुँजीगत कार्यक्रम एलएमबीआईएस प्रणालीमा भए पनि एक्सेल सिटमा हाइड भएका कारण प्रकाशित बजेट पुस्तिकामा नदेखिएको बताए ।
उनले यसबाट कुल बजेटको रकममा कुनै फरक नपरेको स्पष्ट पारे । यसअघि श्रम संस्कृति पार्टीका अध्यक्ष हर्क साम्पाङले बजेट पुस्तिकाका विभिन्न पानामा जोडघटाउ नमिलेको, बजेटको ब्रेकडाउन अपूर्ण रहेको तथा अंकगणितीय त्रुटि देखिएको भन्दै सरकारसँग स्पष्टीकरण मागेका थिए ।
उनले यस्ता त्रुटि नियतवश वा भूलवश भएको हो भन्ने प्रश्नसमेत उठाएका थिए ।
