काठमाडौं, ४ असार । पूर्वसभामुख तथा नेकपा नेता कृष्णबहादुर महराले स्वास्थ्य समस्याका कारण पार्टीको सक्रिय जिम्मेवारीबाट अलग हुने घोषणा गरेको छ ।
लामो समयदेखि एट्रोफी रोगबाट पीडित महराले नियमित उपचार र थेरापीका बाबजुद स्वास्थ्यमा सुधार नआएकाले सक्रिय भूमिका निर्वाह गर्न कठिन भएको बताए ।
बिहीबार जारी वक्तव्यमा उनले करिब ४८ वर्षदेखि कम्युनिस्ट आन्दोलन, पार्टी र जनताको सेवामा समर्पित रहेको स्मरण गर्दै अब साधारण सदस्यका रूपमा रहने निर्णय गरेको जानकारी दिएका छन् ।
उनले आफ्नो निर्णय कुनै असन्तुष्टि वा वैचारिक विचलनका कारण नभई स्वास्थ्य अवस्थाले सिर्जना गरेको बाध्यात्मक परिस्थितिको परिणाम भएको स्पष्ट पारेका छन् ।
