जनकपुरधाम, ४ असार । मधेस प्रदेश सरकारले चालु आर्थिक वर्षको ११ महिनामा कुल बजेटको २१.२४ प्रतिशत मात्र खर्च गर्न सकेको छ ।
प्रदेश लेखा नियन्त्रक कार्यालयका अनुसार ४६ अर्ब ९८ करोड रुपैयाँ बजेटमध्ये जेठ मसान्तसम्म ९ अर्ब ९८ करोड रुपैयाँ मात्र खर्च भएको छ भने आर्थिक वर्ष सकिन एक महिना बाँकी रहँदा ३७ अर्ब रुपैयाँभन्दा बढी बजेट खर्च हुन बाँकी छ ।
यस अवधिमा चालुतर्फ ३६.२२ प्रतिशत र पुँजीगततर्फ १३.७६ प्रतिशत मात्र बजेट खर्च भएको छ । मन्त्रालयहरूमध्ये खेलकुद तथा समाज कल्याण मन्त्रालयको पुँजीगत खर्च सबैभन्दा न्यून ०.५८ प्रतिशत रहेको छ भने अर्थ मन्त्रालयको खर्च सबैभन्दा बढी २४.५९ प्रतिशत छ ।
मधेस प्रदेशका अर्थमन्त्री युवराज भट्टराई ले चालु आर्थिक वर्षको अन्त्यसम्म कुल बजेटको ५९.१५ प्रतिशत खर्च हुने अनुमान गरिएको बताएका छन् ।
