काठमाडौं, ३ असार । भूमि व्यवस्था, सहकारी तथा सङ्घीय मामिला मन्त्री प्रतिभा रावलले असारको तेस्रो सातादेखि सुकुमवासीलाई लालपुर्जा वितरण सुरु गरिने जानकारी दिएकी छन् ।
प्रतिनिधिसभामा आगामी आर्थिक वर्ष २०८३÷०८४ को बजेटमाथिको छलफलमा सांसदहरूको प्रश्नको जवाफ दिँदै उनले सरकारले लालपुर्जा वितरणको तयारी पूरा गरिरहेको बताइन् ।
सांसद हर्क साम्पाङले सुकुमवासीको व्यवस्थापन र लालपुर्जा वितरणबारे प्रश्न उठाएका थिए । मन्त्री रावलका अनुसार सरकारले भूमि सम्बन्धी समितिमार्फत सुकुमवासी व्यवस्थापन तथा जग्गाधनी प्रमाणपत्र (लालपुर्जा) वितरणको काम अगाडि बढाइरहेको छ र वितरण प्रक्रिया असारको तेस्रो सातादेखि सुरु हुनेछ ।
