काठमाडौं, ३ असार । अध्ययन बिदामा गएर अध्ययन पूरा नगरेका तथा अध्ययन सम्पन्न गरेपछि पनि सेवामा नफर्किएका शिक्षक तथा कर्मचारीबाट असुलउपर गर्नुपर्ने रकम उठाउने अभियानलाई त्रिभुबन युनिभरसिटि ले निरन्तरता दिएको छ ।
विश्वविद्यालयले सार्वजनिक सूचना जारी गर्दै अध्ययन बिदा लिएर पनि आफ्नो दायित्व पूरा नगरेका तथा हालसम्म विश्वविद्यालयको सम्पर्कमा आउन आनाकानी गरिरहेका सम्बन्धित शिक्षक तथा कर्मचारीलाई १५ दिनभित्र सम्पर्कमा आउन आग्रह गरेको हो ।
त्रिविका अनुसार अध्ययन बिदा सार्वजनिक लगानीबाट प्रदान गरिने विशेष सुविधा भएकाले त्यसको सदुपयोग गर्नु तथा अध्ययन सम्पन्न गरेपछि संस्थाप्रति उत्तरदायी रहनु सम्बन्धित शिक्षक तथा कर्मचारीको दायित्व हो ।
तर कतिपय शिक्षक तथा कर्मचारीले अध्ययन पूरा नगर्ने, अध्ययन सम्पन्न गरेपछि पनि सेवामा नफर्किने तथा विश्वविद्यालयसँग सम्पर्कविहीन हुने अवस्था देखिएकाले नियमअनुसार असुलउपर प्रक्रिया अघि बढाइएको विश्वविद्यालयले जनाएको छ ।
विश्वविद्यालयले तोकिएको १५ दिनको अवधिभित्र सम्बन्धित व्यक्ति सम्पर्कमा नआए प्रचलित कानुन तथा विश्वविद्यालयका नियमावलीबमोजिम आवश्यक कानुनी कारबाही प्रक्रिया अगाडि बढाइने स्पष्ट चेतावनी दिएको छ ।
साथै अध्ययन बिदा वापत भएको सार्वजनिक लगानीको संरक्षण र दुरुपयोग रोक्न विश्वविद्यालय प्रतिबद्ध रहेको जनाएको छ ।
विश्वविद्यालयको यो अभियानले अध्ययन बिदा लिएर दायित्व पूरा नगर्ने शिक्षक तथा कर्मचारीलाई जवाफदेही बनाउने तथा सार्वजनिक लगानीको संरक्षण गर्ने उद्देश्य लिएको बताइएको छ ।
