काठमाडौं, २ असार । औषधि व्यवस्था विभागले तोकिएको समयभित्र नवीकरण नगर्ने ५ हजार ३०२ औषधि पसल तथा फार्मेसीको दर्ता प्रमाणपत्र स्वत खारेज भएको जनाएको छ ।
विभागले मंगलबार सूचना जारी गर्दै औषधि ऐन, २०३५ अनुसार नवीकरण म्याद सकिएका र समयमै नवीकरण नभएका पसलहरूको प्रमाणपत्र रद्द गरिएको जानकारी दिएको हो ।
विभागका अनुसार जेठ २८ गतेसम्म नवीकरण नगरेका पसलहरूको सूची सार्वजनिक गरिएको छ ।
प्रमाणपत्र खारेज भएका पसलहरूले अब कानुनी रूपमा औषधि व्यवसाय सञ्चालन गर्न पाउने छैनन् । विभागले सबै सञ्चालकलाई आफ्नो प्रमाणपत्रको अवस्था यकिन गरी आवश्यक कानुनी प्रक्रिया पूरा गर्न तथा प्रचलित कानुन र निर्देशनको पालना गर्न आग्रह गरेको छ ।
