जनकपुरधाम, १ असार । मधेस प्रदेश सरकारले आगामी आर्थिक वर्ष २०८३/८४ को बजेटमार्फत अति विपन्न तथा सीमान्तकृत समुदायका नागरिकलाई स्वास्थ्य बीमाको दायरामा ल्याउने घोषणा गरेको छ ।
प्रदेश सरकारले स्वास्थ्य सेवामा पहुँच विस्तार गर्दै कमजोर आर्थिक अवस्था भएका परिवारलाई राहत दिने उद्देश्यले यो कार्यक्रम अघि सारेको हो ।
सोमबार प्रदेशसभामा बजेट प्रस्तुत गर्दै युवराज भट्टराई ले अति विपन्न तथा सीमान्तकृत वर्गका नागरिकको स्वास्थ्य बीमा गरिने जानकारी दिए । उनले स्वास्थ्य सेवाको गुणस्तर सुधार र सर्वसुलभ पहुँच सुनिश्चित गर्न विभिन्न नयाँ कार्यक्रमहरू सञ्चालन गरिने बताए ।
बजेटमा बिरामीले समयमै एम्बुलेन्स सेवा प्राप्त गर्न सकून् भन्ने उद्देश्यले प्रदेशभर सञ्चालनमा रहेका एम्बुलेन्समा जीपीएस प्रणाली जडान गर्ने व्यवस्था पनि समावेश गरिएको छ ।
यसबाट आपत्कालीन अवस्थामा बिरामीलाई छिटो स्वास्थ्य संस्थासम्म पुयाउन सहज हुने सरकारको अपेक्षा छ ।
महिला सशक्तीकरणलाई लक्षित गर्दै प्रदेश सरकारले बेटी पढाउ, बचाउ कार्यक्रमलाई परिमार्जन गरी शिक्षित छोरी, सुरक्षित मधेस, उद्यमशील नारी, समृद्ध प्रदेश अभियानका रूपमा अगाडि बढाउने घोषणा गरेको छ ।
