काठमाडौं, २८ जेठ । संघीय संसद्को राज्य व्यवस्था तथा सुशासन समितिले सरकारका मन्त्रालय तथा निकायहरूको कामकारबाही अध्ययन, अनुगमन र सहजीकरण गर्न विभिन्न उपसमिति गठन गरेको छ ।
बिहीबार सभापति हरि ढकालको अध्यक्षतामा बसेको बैठकले प्रधानमन्त्री तथा मन्त्रिपरिषद्को कार्यालय र रक्षा मन्त्रालय हेर्न अमरेशकुमार सिंह को नेतृत्वमा सात सदस्यीय उपसमिति गठन गरेको छ ।
गृह मन्त्रालयका लागि दीपकराज बोहरा तथा भूमि व्यवस्था, सहकारी, संघीय मामिला तथा सामान्य प्रशासन मन्त्रालयका लागि कमल सुवेदी को नेतृत्वमा उपसमिति बनाइएको छ ।
त्यस्तै, अख्तियार, निर्वाचन आयोग र लोक सेवा आयोगलगायत संवैधानिक निकायहरूको अध्ययनका लागि सुरेन्द्र चौधरी को नेतृत्वमा समिति गठन गरिएको छ ।
समितिले कार्यविधि मस्यौदा तयारी, उजुरी अध्ययन तथा सुझाव सिफारिसका लागि पनि छुट्टाछुट्टै उपसमिति बनाएको छ । बैठकले अख्तियार दुरुपयोग अनुसन्धान आयोग र कारागार कार्यालयको स्थलगत अनुगमन गर्ने निर्णयसमेत गरेको छ ।
त्यसका लागि अनुगमन टोली गठन गर्ने जिम्मेवारी सभापति ढकाललाई दिइएको छ ।
