जनकपुर, २८ जेठ । अविरल वर्षाका कारण जनकपुरका विभिन्न क्षेत्र जलमग्न भइरहेका बेला जनकपुर उपमहानगरपालिका–९ स्थित साकेतनगरमा एक सरकारी गाडी नालामा फसेको छ ।
मधेश प्रदेश २-०२-००१ झ ०१०६ नम्बरको उक्त सरकारी गाडी पानीले ढाकिएको सडकमा यात्रा गर्ने क्रममा नालामा फसेको स्थानीयले बताएका छन् । गाडी मधेश स्वास्थ्य विज्ञान प्रतिष्ठान, जनकपुरको रहेको जनाइएको छ ।
भारी वर्षापछि सडकमा पानी जमेकाले नाला तथा सडकको सतह छुट्याउन कठिन भएको थियो । सोही कारण गाडी नालातर्फ चिप्लिएर फसेको बताइएको छ ।
घटनामा कुनै मानवीय क्षति नभएको र गाडी निकाल्ने प्रयास भइरहेको स्थानीय स्रोतले जनाएको छ । लगातारको वर्षासँगै जनकपुरका विभिन्न सडक तथा गल्लीहरू डुबानमा परेका छन् ।
पानी निकासको प्रभावकारी व्यवस्था नहुँदा सवारी आवागमन र सर्वसाधारणको दैनिक जनजीवन प्रभावित बनेको छ । स्थानीयवासीले डुबान समस्या समाधानका लागि सम्बन्धित निकायको ध्यानाकर्षण गराएका छन् ।
