काठमाडौं, २८ जेष्ठ । बजेटमा करका दर हेरफेर तथा भन्सारमा भएको भनिएको राजस्व चुहावटबारे प्रतिनिधि सभाको सार्वजनिक लेखा समितिमा सांसदहरूले उच्चस्तरीय छानबिनको माग गरेका छन् ।
बिहीबार बसेको समितिको बैठकमा सांसदहरू खुस्बु ओली, आर्यन राई, महेन्द्र शाही, यज्ञबहादुर बोगटी र गणेश ठङ्गुनाले संसदीय उपसमिति गठन गरी विस्तृत छानबिन गर्नुपर्ने बताएका हुन् ।
सांसद ओलीले २०८० सालदेखि भन्सार कार्यालयहरूमा सवारीसाधनको सिट क्षमता हेरफेर गरी अर्बौँ रुपैयाँ राजस्व चुहावट भएको दाबी गरिन् । उनका अनुसार ७–८ सिट भएका गाडीलाई ११ सिटको रूपमा कायम गरी कम भन्सार महसुल तिराइएको छ।
उनले मन्त्रालयको आन्तरिक छानबिनमाथि प्रश्न उठाउँदै लेखा समितिअन्तर्गत छुट्टै उपसमिति गठन गर्न माग गरिन् । सांसद राईले राजस्व चुहावट रोक्न र सुशासन कायम गर्न उच्चस्तरीय छानबिन आवश्यक रहेको बताए भने अन्य सांसदहरूले पनि अर्थ मन्त्रालयको छानबिन पर्याप्त नभएको भन्दै संसदीय उपसमितिमार्फत सत्यतथ्य सार्वजनिक गर्नुपर्ने धारणा राखे ।
