एजेन्सी, २८ जेठ। विश्व फुटबलको सबैभन्दा प्रतिष्ठित प्रतियोगिता फिफा विश्वकप २०२६ आजदेखि सुरु हुँदैछ। अमेरिका, क्यानडा र मेक्सिकोको संयुक्त आयोजनामा हुन लागेको यस विश्वकपमा पहिलो पटक ४८ राष्ट्रले सहभागिता जनाउँदै छन्। प्रतियोगिता जुलाई १९ सम्म सञ्चालन हुनेछ।
उद्घाटन खेल मेक्सिको सिटीस्थित ऐतिहासिक एस्टाडियो अज्टेकामा आयोजना हुनेछ, जहाँ आयोजक राष्ट्र मेक्सिकोले दक्षिण अफ्रिकाको सामना गर्नेछ। प्रतियोगिताको फाइनल खेल भने जुलाई १९ मा न्युयोर्क–न्यु जर्सीस्थित स्टेडियममा खेलाइनेछ।
विश्वकपको समूह चरण जुन ११ देखि २७ सम्म चल्नेछ। त्यसपछि नकआउट चरणअन्तर्गत राउण्ड अफ ३२, राउण्ड अफ १६, क्वार्टरफाइनल, सेमिफाइनल तथा फाइनल खेलहरू क्रमशः जुलाई १९ सम्म सञ्चालन हुनेछन्।
यस संस्करणमा कुल १०४ खेल खेलाइनेछन्। १२ समूहमा विभाजित ४८ टोलीमध्ये प्रत्येक समूहका शीर्ष दुई टोली तथा उत्कृष्ट प्रदर्शन गर्ने आठ तेस्रो स्थानका टोली नकआउट चरणमा पुग्नेछन्।
प्रतियोगिताको सुरुआती चरणमा मेक्सिको–दक्षिण अफ्रिका, क्यानडा–बोस्निया तथा हर्जगोभिना, अमेरिका–पाराग्वे, ब्राजिल–मोरक्को र नेदरल्यान्ड्स–जापानबीचका खेलहरू मुख्य आकर्षणका रूपमा रहने अपेक्षा गरिएको छ।
विश्वभरका फुटबल समर्थकहरूको ध्यान तानेको यस प्रतियोगिताले आगामी केही सातासम्म फुटबलमय माहोल सिर्जना गर्ने विश्वास गरिएको छ।
