काठमाडौं, २७ जेष्ठ । सर्वोच्च अदालतले परीक्षा हलमा जफत गरिएका मोबाइल फोन तथा तिनमा रहेका डाटा नष्ट नगर्न आदेश दिएको छ ।
गत एसईई परीक्षाका क्रममा सिरहामा झण्डै एक करोड रुपैयाँ बराबरका मोबाइल फोन नष्ट गरिएको घटनासम्बन्धी रिटमाथि सुनुवाइ गर्दै न्यायाधीश श्रीकान्त पौडेलको इजलासले गृह मन्त्रालय, जिल्ला प्रशासन कार्यालय सिरहालगायत सरोकारवाला निकायलाई मोबाइल सुरक्षित राख्न निर्देशन दिएको हो ।
सर्वोच्चले जफत गरिएका मोबाइल र डाटा किन नष्ट गरिएको हो भन्नेबारे कारणसमेत पेस गर्न आदेश दिएको छ । गत चैतमा एसईई परीक्षाका क्रममा जफत गरिएका ७ आइफोन, ४८९ एन्ड्रोइड मोबाइल र ५ स्मार्टवाच जिल्ला परीक्षा समन्वय समिति सिरहाको निर्णयअनुसार प्रहरी परिसरमा नष्ट गरिएको थियो ।
उक्त घटनाको भिडियो सार्वजनिक भएपछि व्यापक आलोचना भएको थियो । रिट निवेदकहरूले मोबाइल जफत भए पनि कानुनी प्रक्रिया पूरा गरी फिर्ता गर्नुपर्नेमा मनपरी ढंगले नष्ट गरिएको दाबी गरेका छन् ।
