मतदाता नामावली विवादपछि रास्वपा बागमती प्रदेशको निर्वाचन स्थगित

काठमाडौं, २७ जेठ । राष्ट्रिय स्वतन्त्र पार्टी (रास्वपा) बागमती प्रदेश अधिवेशनअन्तर्गतको निर्वाचन प्रक्रिया स्थगित गरिएका छन् ।

निर्वाचन समिति संयोजक सुमित्रा पण्डितले मतदाता नामावली सम्बन्धी विवादका कारण हालका लागि निर्वाचन कार्यक्रम रोकिएको जानकारी दिएकी छन् । उनका अनुसार आगामी २४ घण्टाभित्र नयाँ सूचना जारी गरी निर्वाचनको आगामी कार्यतालिका सार्वजनिक गरिनेछ ।

निर्वाचन समितिले मंगलबार हस्तलिखित मतदाता नामावली प्रकाशित गरेको थियो । नामावली सार्वजनिक भएपछि त्यसको विश्वसनीयता र व्यवस्थापनबारे प्रश्न उठे पनि उम्मेदवारी दर्ता प्रक्रिया भने अघि बढाइएको थियो ।

विवाद थप चर्किएपछि निर्वाचन प्रक्रिया रोकिएको हो । निर्वाचन स्थगित भएसँगै अधिवेशनस्थल खाली हुन थालेको छ र अधिकांश प्रतिनिधि फर्किएका छन् । स्थानीय सुरक्षाकर्मीहरूले पनि प्रतिनिधिहरूलाई कार्यक्रम स्थगित भएको जानकारी दिँदै अधिवेशनस्थल खाली गराएको छ ।

रास्वपाको बागमती प्रदेश अधिवेशनबाट नयाँ नेतृत्व चयन गर्ने तयारी भए पनि निर्वाचन व्यवस्थापनसम्बन्धी विवादका कारण प्रक्रिया अनिश्चित बनेको छ ।