काठमाडौं, १३ जेष्ठ । विश्व भू–राजनीतिक तनाव, मध्यपूर्वमा जारी युद्ध र इन्धनको मूल्यवृद्धिले नेपालको अर्थतन्त्र प्रभावित भएको आर्थिक सर्वेक्षणले देखाएको छ ।
युद्धका कारण विप्रेषण, पर्यटन र बजार मूल्यमा असर पर्ने आकलन गरिएको छ । अर्थमन्त्री डा.स्वर्णिम वाग्लेले संसद्मा पेश गरेको आर्थिक सर्वेक्षणअनुसार विदेशी विनिमय सञ्चिति भने हालसम्मकै उच्च अवस्थामा पुगेको छ, जसले १८.५ महिनासम्मको आयात धान्न सक्ने क्षमता रहेको उल्लेख छ ।
सर्वेक्षणमा कृषि उत्पादन मौसम प्रतिकूलताका कारण घटेको, सार्वजनिक ऋण बढेर २८ खर्ब ७८ अर्ब पुगेको तथा पूँजीगत खर्च कमजोर रहेको उल्लेख छ ।
यद्यपि विद्युत् उत्पादन वृद्धि, विप्रेषण आम्दानी, चालु खाता र शोधनान्तर स्थिति सकारात्मक रहेको जनाइएको छ । बैंकिङ क्षेत्रमा पर्याप्त तरलता र कम ब्याजदर भए पनि निजी क्षेत्रमा अपेक्षित कर्जा प्रवाह हुन नसकेको तथा निष्क्रिय कर्जा बढेको सर्वेक्षणमा उल्लेख गरिएको छ ।
