काठमाडौं, १२ जेष्ठ । काठमाडौंमा प्रतिनिधिसभा नियमावलीको नयाँ मस्यौदामाथि ३५ वटा संशोधन प्रस्ताव दर्ता भएका छन् ।
विभिन्न दलका सांसदहरूले प्रस्तावित केही व्यवस्थाप्रति असन्तुष्टि जनाएका हुन् । विशेषगरी संसदीय समितिको बैठक मन्त्रीको उपस्थितिविना पनि सञ्चालन गर्न सकिने प्रावधान, सांसदलाई विशेषाधिकार दिने व्यवस्था तथा संविधान संशोधन विधेयक सम्बन्धी नयाँ प्रक्रियामा विपक्षी दलहरूले विरोध गरेका छन् ।
नयाँ मस्यौदाअनुसार विधेयकबाहेक अन्य विषयमा मन्त्री उपस्थित नभए पनि समिति बैठक बस्न सक्ने व्यवस्था गरिएको छ, जबकि पुरानो नियमावलीमा सबै बैठकमा मन्त्रीको उपस्थिति अनिवार्य थियो। साथै, नियमावलीलाई विशेष कानुनसरह लागू हुने तथा सांसदको विशेषाधिकारको रूपमा रहने व्यवस्था थपिएको छ ।
संविधान संशोधनसम्बन्धी विधेयक राष्ट्रिय सभाबाट अस्वीकृत भए पनि दुवै सदनमा दुई तिहाइ मत पुगेको अवस्थामा अगाडि बढाउन सकिने प्रस्तावित व्यवस्थाले पनि विपक्षी दलको असन्तुष्टि बढाएको छ ।
