जनकपुर, ११ जेठ । सत्तारुढ नेपाली कम्युनिस्ट पार्टी (नेकपा) को असन्तुष्टिका कारण मधेश प्रदेश सरकार विस्तार फेरि रोकिएको छ ।
नेकपाको असन्तुष्टिका कारण आज साँझ शपथका लागि बोलाइएका एमालेका तीन सांसद बिना शपथ फर्किएका छन् ।
मुख्यमन्त्री कृष्णप्रसाद यादवले एमालेबाट शरदादेवी थापा, मनोजकुमार सिंह र लखन दासलाई मन्त्री नियुक्त गरी शपथ गराउने तयारी गरेका थिए ।
तर नेकपाको असन्तुष्टि समाधान गर्न तीन दलबीच झन्डै अढाइ घण्टा वार्ता चलेपछि शपथ कार्यक्रम रोकिएको हो । वार्तापछि १३ बुँदे सहमतिको खाका तयार भएको छ ।
सहमतिमा आगामी बजेटमा १ करोडभन्दा कमका योजना नराख्ने, खुला प्रतिस्पर्धाबाट योजना कार्यान्वयन गर्ने, मन्त्रालय संख्या ९ मा सीमित गर्ने, कर्मचारी सरुवाको मापदण्ड बनाउने तथा म्याद सकिएका उपभोक्ता समितिका चिठ्ठी रद्द गर्ने लगायत विषय समेटिएका छन् ।
यसअघि भएको ९ बुँदे सहमतिमा हस्ताक्षर नभएकाले त्यसलाई विस्तार गरी १३ बुँदे बनाइएको बताइएको छ ।
उक्त सहमतिमा मंगलबार हस्ताक्षर गरेपछि एमालेका तीन जना र नेकपाबाट अर्थमन्त्रीसहित सरकार विस्तार गरी शपथ गराउने तयारी गरिएको छ ।
